ന്യൂഡല്‍ഹി: സൗദി അറേബ്യയിലെ വിമാനത്താവളങ്ങള്‍ക്കുനേരെയുണ്ടായ ഹൂതി ആക്രമണങ്ങളുടെ പശ്ചാത്തലത്തില്‍ റിയാദിലേക്കുള്ള വിമാന സര്‍വീസുകള്‍ റദ്ദാക്കി ഇന്ത്യന്‍ വിമാനക്കമ്പനികള്‍. സുരക്ഷാ സാഹചര്യം കണക്കിലെടുത്ത് ഇന്റിഗോ , എയര്‍ ഇന്ത്യ, എയര്‍ ഇന്ത്യ എക്‌സ്പ്രസ് തുടങ്ങിയ വിമാനക്കമ്പനികളാണ് ഒക്ടോബര്‍ 10 വരെ റിയാദിലേക്കുള്ള ചില സര്‍വീസുകള്‍ റദ്ദാക്കിയത്. കൊച്ചി അന്താരാഷ്ട്ര വിമാനത്താവളത്തില്‍നിന്നുള്ള രണ്ട് സര്‍വീസുകളും റദ്ദാക്കിയിട്ടുണ്ട്.

ഇറാന്‍ പിന്തുണയുള്ള ഹൂതി വിമതര്‍ കഴിഞ്ഞ ദിവസങ്ങളില്‍ സൗദി അറേബ്യയിലെ വിമാനത്താവളങ്ങള്‍, സൈനിക കേന്ദ്രങ്ങള്‍, എണ്ണ ശാലകള്‍ എന്നിവ ലക്ഷ്യമിട്ട് ആക്രമണം നടത്തിയിരുന്നു. സൗദി വ്യോമമേഖലയിലൂടെ സര്‍വീസ് നടത്തുന്ന രാജ്യാന്തര വിമാനക്കമ്പനികള്‍ക്കും ഹൂതികള്‍ മുന്നറിയിപ്പ് നല്‍കിയിരുന്നു.

ആക്രമണ വിവരങ്ങള്‍ പുറത്തുവന്നതിനെ തുടര്‍ന്ന് ഡല്‍ഹിയില്‍നിന്ന് റിയാദിലേക്ക് പുറപ്പെട്ട എയര്‍ ഇന്ത്യ വിമാനം യാത്രാമധ്യേ തിരിച്ചിറക്കി. റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലെ സുരക്ഷാ സാഹചര്യം കണക്കിലെടുത്താണ് കൊച്ചിയില്‍നിന്നുള്ള റിയാദ് സര്‍വീസുകളും റദ്ദാക്കിയത്.

കൊച്ചിയില്‍നിന്നുള്ള ആകാശ എയറിന്റെ QP523, സൗദിയയുടെ SV775 എന്നീ സര്‍വീസുകളാണ് റദ്ദാക്കിയത്. യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിനായാണ് സര്‍വീസുകള്‍ താല്‍ക്കാലികമായി നിര്‍ത്തിവെച്ചതെന്ന് വിമാനക്കമ്പനികള്‍ അറിയിച്ചു. സര്‍വീസ് റദ്ദാക്കിയതിനെ തുടര്‍ന്ന് യാത്ര ചെയ്യാനാകാത്തവര്‍ക്ക് മുഴുവന്‍ തുകയും റീഫണ്ട് ചെയ്യുമെന്നും കമ്പനികള്‍ വ്യക്തമാക്കി.

അതേസമയം, റിയാദിലെ കിങ് ഖാലിദ് അന്താരാഷ്ട്ര വിമാനത്താവളവും യാത്രക്കാര്‍ക്ക് ജാഗ്രതാ നിര്‍ദേശം നല്‍കിയിട്ടുണ്ട്. യാത്രക്കാര്‍ വിമാനക്കമ്പനികളുമായി നേരിട്ട് ബന്ധപ്പെട്ട് സര്‍വീസ് സംബന്ധിച്ച ഏറ്റവും പുതിയ വിവരങ്ങള്‍ പരിശോധിക്കണമെന്ന് വിമാനത്താവളം അറിയിച്ചു. സൗദി തലസ്ഥാനത്ത് നിരവധി സ്‌ഫോടന ശബ്ദങ്ങള്‍ കേട്ടതിന് പിന്നാലെയാണ് വിമാനത്താവള അധികൃതരുടെ നിര്‍ദേശം.

ഹൂതികള്‍ ആക്രമണം നടത്തിയതായി അവകാശപ്പെട്ട റിയാദ്, അബ്ഹ വിമാനത്താവളങ്ങളിലുണ്ടായ ആക്രമണങ്ങളില്‍ മൂന്ന് പേര്‍ കൊല്ലപ്പെട്ടതായി സൗദി അധികൃതര്‍ ബുധനാഴ്ച അറിയിച്ചു. സൗദിയും സഖ്യകക്ഷിയായ യെമന്‍ സേനയും ഹൂതികള്‍ക്കെതിരെ വ്യാപകമായ കര-വ്യോമ ആക്രമണം ആരംഭിച്ചതിന് ശേഷമുള്ള ആക്രമണങ്ങളില്‍ റിപ്പോര്‍ട്ട് ചെയ്യപ്പെടുന്ന ആദ്യ മരണങ്ങളാണിത്.